Шинэ зууны эмэгтэйчүүдийн манлайлал ба Дижитал эрин дэх тэгш байдал
Олон улсын эмэгтэйчүүдийн эрхийг хамгаалах өдөр бол жирийн нэг баярын өдөр биш, харин олон жилийн туршид жендэрийн тэгш байдлыг хангахын төлөө хийж бүтээсэн ололт амжилтаа дүгнэх, цаашид хийх ажлаа тодорхойлох чухал мөч юм.
2025 оны хувьд Бээжингийн Тунхаглалын 30 жилийн ой тохиож байгаа бөгөөд энэ нь бидэнд ололт амжилт, туршлага, сургамжаа эргэж харах, суралцах, урагшлах чигээ шинээр тодорхойлох боломжийг олгож байна.
Монгол Улсад эмэгтэйчүүдийн оролцоо, эрхийг хангах чиглэлээр олон дэвшил гарсан ч шийдвэр гаргах түвшин, дижитал орон зай, инновацийн салбар дахь оролцоо нь хараахан хангалттай түвшинд хүрээгүй байна. Бид гэр бүл, хүүхдэд ээлтэй орчин бүрдүүлж чадсан бил үү, хүчирхийлэл буурсан бил үү ??? Нийгмийн шударга ёс хангагдаагүйгээс үүдсэн ялгаварлал, иргэндээ ээлгүй төрийн шийдвэрүүд хамгийн түрүүнд хэнд очиж тусдаг билээ???
Энэ бүхнээ шийдэж амжаагүй байхад шинэ эриний шинэ сорилтууд хүч түрэн орж ирлээ. Дэлхий даяар эмэгтэйчүүдийн манлайллын шинэ давлагаа өрнөж байна.
Өнөөдрийн технологийн эрин үед эмэгтэйчүүдийн оролцоо зөвхөн уламжлалт салбарт бус, инноваци, хиймэл оюун ухаан, өгөгдлийн шинжилгээ, программ хангамж зэрэг ирээдүйг тодорхойлох салбарт өргөжих шаардлагатай болж байна. Энэ нь зөвхөн хөгжлийн тухай асуудал биш, харин шударга, хүртээмжтэй нийгмийг цогцлоох тухай асуудал юм. Шударга, хүртээмжтэй нийгэм нь зөвхөн эмэгтэйчүүдийн тухай асуудал биш юм.
Монголын эмэгтэйчүүд, залуус энэхүү манлайллын шинэ хэв маягийг бүтээхэд идэвхийлэн оролцох замаар нийгэмд өөрчлөлт авчирахад хувь нэмрээ оруулах цаг ирээд байна. Нийгэм, улс төрийн зүтгэлтнүүд, мэргэжлийн салбарт тэргүүлж буй эмэгтэйчүүд, STEM салбарт суралцаж буй залуу үеийн төлөөлөл энэ өөрчлөлтийн гол хөдөлгөгч хүч байх болно.
Бид зөвхөн тэгш эрхийн талаар ярих бус, тэгш оролцоо, хүртээмжийг бодит ажил хэрэг болгоход хүчээ нэгтгэх ёстой. Тиймээс төр, хувийн хэвшил, иргэний нийгэм төдийгүй, гэр бүл, хамт олон, албан байгууллага бүр энэ чиглэлээр илүү нягт түншлэн ажиллаж, хамтдаа хөгжиж, хөгжлийн төлөөх хамтын санаачлагаа бодлогын түвшинд, бизнесийн орчинд, шинжлэх ухаан, технологид улам бүр нэмэгдүүлэхийг зорих ёстой.
Бидэнд урагшлах их зам бий. Монголын эмэгтэйчүүд, охидын ирээдүй гэрэлтэй байх болтугай, та бүхний чин хүсэл болсон гэр бүл хайртай хүмүүсийнх нь аз жаргалын төлөө хундага дарс биш, хэдхэн үгээр цацал өргөмүй. Ц. Бүжидмаа
