Олон улсын эмэгтэйчүүдийн эрхийг хамгаалах өдөр Мартын 8- ыг энэ жил “For ALL Women and Girls: Rights. Equality. Empowerment.” гэсэн уриан дор тэмдэглэгдэхээр тогтож, олон улсын байгууллагууд, улс орнуудын засгийн газар, иргэний нийгмийн байгууллагууд, хувийн хэвшил, хэвлэл мэдээлэл, олон нийт хамтран ажиллахыг UN Women уриалж байна.
Энэ хүрээнд зохион байгуулагдах үйл ажиллагаанууд БҮХ эмэгтэйчүүд, охидын эрх, тэгш байдал болон тэднийг чадавхижуулах үйлсэд чиглэгдэж байна. Мөн #ForAllWomenAndGirls хаштагыг ашиглан дижитал платформууд дээр мэдээлэл хуваалцаж, хэлэлцүүлэг өрнүүлэхийг санал болгож байна.
Эмэгтэйчүүд Залуучуудын Оюуны Сан Үндэсний сүлжээ, Либерал эмэгтэйчүүдийн оюуны сан жил бүрийн Мартын 8-ийг баяр ёслолын байдлаар биш үндсэн агуулгаар нь тэмдэглэн өнгөрүүлэхийг уриалдаг.
Дэлхийн улс орнууд эмэгтэйчүүдийн эрхийг хамгаалах өдрийг 1910 оноос эхлэн тэмдэглэж байгаа бөгөөд энэ өдөр эмэгтэйчүүд эрхийнхээ төлөө тэмцэх, дайныг эсэргүүцэх, үзэл бодол, эв санааны нэгдлээ илэрхийлэх зэрэг арга хэмжээг зохион байгуулдаг. Бид ч энэ давалгааг эх орондоо эхлүүлж, үргэлжлүүлсээр ирсэн.
Харин сүүлийн үед “Эмэгтэйчүүдийн эрхийг хамгаалах өдөр” хэмээх үндсэн агуулга нь бүдгэрч, баяр наадмын өнгө аястай болж ирсэн. Иймд “Эмэгтэйчүүд залуучуудын оюуны сан” Үндэсний сүлжээ, ЛЭОС ТББ өмнөх жилүүдийн нэгэн адил энэ өдрийг үндсэн утга агуулгынх нь хүрээнд тэмдэглэн өнгөрүүлэхийг УРИАЛЖ байна.
Байгууллага аж ахуйн нэгжүүд, хамт олон бүр энэ өдөр БАЯРЫН ширээний ард биш ХЭЛЭЛЦҮҮЛГИЙН ширээний ард сууж, эмэгтэйчүүдээ сонсож, эмэгтэйчүүдэд тулгарч буй асуудлыг хэлэлцэх, шийдэл гаргах БҮТЭЭЛЧ арга хэмжээ зохион байгуулж хэвшье.
Энэ өдрийг эмэгтэйчүүд бид нийгмийн шударга ёс, хөгжил дэвшил, эв нэгдлийн асуудлаар дуу хоолойгоо өргөдөг, “АРХИГҮЙ” өдөр болгох зорилгод нэгдэцгээе.