Монгол Улсын Үндсэн хууль батлагдсаны 30 жил, Монгол Улсад орчин цагийн парламент үүсэн байгуулагдсаны 30 жилийн ойг тохиолдуулан Улсын Их Хурлын Төрийн байгуулалтын байнгын хороо, НҮБ-ын “Шийдвэр гаргах түвшинд жендэрийн тэгш байдал, эмэгтэйчүүдийн оролцоог дэмжих нь” төсөлтэй хамтран үе үеийн эмэгтэй парламентчдыг оролцуулсан “Эмэгтэй парламентчдын чуулган-2022”-ыг анх удаа 2022.09.07 нд Төрийн ордонд зохион байгуулсан.
Оролцъё, төлөөлье” уриатай зохион байгуулсан энэхүү чуулганд 1992 оноос өнөөдрийг хүртэлх хугацаанд Улсын Их Хурлын гишүүнээр сонгогдон ажиллаж байсан болон өдгөө Улсын Их Хурлын гишүүнээр ажиллаж байгаа эмэгтэйчүүдийн төлөөлөл, НҮБ-ын Хөгжлийн хөтөлбөр, “КОЙКА” олон улсын байгууллага, улстөрийн намуудын удирдлагын болон намын дэргэдэх эмэгтэйчүүдийн байгууллагын төлөөлөгчид, “Манлайллын сүлжээ ТББ, нийгмийн зүтгэлтэн эмэгтэйчүүдийн төлөөлөл оролцлоо.
Эмэгтэй парламентчдын энэ удаагийн чуулганыг Улсын Их Хурлын дарга Г.Занданшатар нээж үг хэлсэн юм.
Тэрбээр, байнгын ажиллагаатай парламентын 30 жилийн түүхэнд 8 удаа Улсын Их Хурлын сонгууль болж, нийт 43 эмэгтэй давхардсан тоогоор 68 удаа Улсын Их Хурлын гишүүнээр сонгогдон, ард түмнийхээ элч болон ажиллажээ. Эмэгтэй гишүүд нийгмийн хүч сул бүлгүүдийн дуу хоолой болохын зэрэгцээ гэр бүлийн, хөдөлмөрийн, боловсролын, эрүүл мэндийн гээд эмэгтэйчүүдийн хөдөлмөр эрхлэлт давамгайлдаг, амин чухал салбаруудын хуулиудад илүү идэвх санаачилгатай ажиллаж ирсэн гэдгийг онцоллоо.
Энэхүү 30 жилийн хугацаанд анх нийт Улсын Их Хурлын гишүүдийн 3.9 хувийг эмэгтэйчүүд бүрдүүлж байсан бол сүүлийн хоёр удаагийн Улсын Их Хурлын сонгуулиар нийт гишүүдийн 17.1 хувь нь эмэгтэйчүүд болон нэмэгджээ. Гэхдээ дэлхийн улс орнуудын дундажтай харьцуулахад хангалттай үзүүлэлт биш юм гэлээ.
Эмэгтэй парламентчдын анхны энэхэүү форумд “Эмэгтэйчүүд, залуучуудын оюуны сан” үндэсний сүлжээний тэргүүн доктор Ц.Бүжидмаа “Монгол дахь эмэгтэйчүүдийн улс төрийн оролцоо, гадаад орны туршлага” сэдвээр илтгэл танилцуулсан.
Тэрбээр , Монгол Улс дахь эмэгтэйчүүдийн улс төрийн оролцооны өнөөгийн байдал, эмэгтэйчүүдийн улс төрийн оролцооны олон улсын туршлагын талаар танилцуулж, сайн туршлагыг хэрэгжүүлэх боломжийн талаар сонирхолтой илтгэл тавьж, оролцогчдын асуултад хариулав.